Купіць Біблію з дастаўкай па Беларусі

Зварот з нагоды 500-годдзя выдання «Апостала» Францыскам Скарынам

У 2025 г. спаўняецца 500 гадоў з часу выдання Францыскам Скарынам «Апостала» (Дзеі Апостальскія і Пасланні апосталаў). У 1517 г. Францыск Скарына пачаў друкаваць у Празе Біблію на беларускай мове. Гэтая праца была скончана ў 1525 г. у Вільні выданнем «Апостала». Пачынаючы з гэтага часу Біблія стала адным з галоўных сімвалаў беларускай мовы, культуры, сімвалам беларускага народу.

З моманту адраджэння беларускай дзяржаўнасці ў ХХ ст. юбілеі, звязаныя з біблейскімі перакладамі і выданнямі Францыска Скарыны, адзначаюцца пастаянна.

У 1925 г. адзначэнне 400-годдзя беларускага кнігадрукавання паклала пачатак шырокай вядомасці беларускага першадрукара і яго справы.

У 2017 г. 500-годдзе беларускага кнігадрукавання было адзначанна з’яўленнем пяці перакладаў Новага Запавету на беларускую мову.

Ушаноўваючы юбілей выдання «Апостала», завяршальнага выдання ў шэрагу біблейскіх выданняў Скарыны, звернемся да Кнігі, якая стала пачаткам усіх беларускіх кніг, каб Біблія, якую Францыск Скарына прагнуў даць свайму народу, стала асновай жыцця кожнага беларуса.

Мы звяртаемся да цэркваў, да прадстаўнікоў улады, дзеячаў адукацыі, навукі, культуры, і заклікаем абвясціць 2025 год годам беларускай Бібліі і годна адзначыць гэты юбілей. Няхай 2025 год стане годам умацавання міру і хрысціянскіх каштоўнасцяў у жыцці ўсяго народа Беларусі.